Abanjwe omabini amabanjwa awayeqhweshe eNgqeleni
21 May 2023 – Monwabisi Khininda
ENgqeleni
Liphinde labanjwa kwakhona ibanjwa lokugqibela kwamabini abaleke kwiziko loluleko kwidolophu yaseNgqeleni ngoLwesine weveki engaphaya kwephelileyo. Ngokwengxelo yelisebe eli banjwa linguAthini Nothi Mzingelwa libanjwe ngoLwesihlanu kwisibhedlele iMthatha General. Okwangoku akukacaci ukuba ufike njani kwesi sibhedlele.
UMkomishinala wamapolisa kuzwelonke uMakgothi Thobagale uncome uncedo loluntu ngokusoloko benika isebe inkcukacha ngethuba kuzingelwa eli banjwa eligwetyelwe ukudlwengula. UThobakgale uthi oku kukhokhelele ukuba kubanjwe uMzingelwa. Kulindeleke ayodibana nogxa wakhe uSiyabulela Khohliso obeqhweshe naye eNgqeleni ngosuku lokubhiyozelwa kwenkululeko ngethuba besebaleni.
Eli sebe lithi bazojongana netyala lokuqhwesha eluvalelweni. Ukubaleka kwalamabanjwa kukhokhelele ukuba kunqunyanyiswe amadindala asibhozo ubuncinane loo gama amabini kuvakala ukuba anikwe iileta zokubonisa iinjongo zokuwanqumamisa.
