Amashishini asakhulayo eGcuwa afumana inkxaso
15 ISilimela 2023 – Anele Raziya
Gcuwa
Amashishini asakhulayo eGcuwa aphinde afumana inyhweba yokufumana inkxaso kwelinye isebe lika rhulumente emveni kokuba kwiveki ezimbalwa ezidlulileyo isebe elijongene noKhuliswa kwezoQoqosho nezoKhenketho ephondweni bekunye nequmrhu, Eastern Cape Development Corporation (ECDC) baye baxhasa amashishini wokuthanga iimpahla ngeematshini zokuthunga namalaphu.
Kwiveki ephelileyo kwiholo yedolophu yaseGcuwa, usekela mphathiswa kwisebe elijongene namashishini amancinane, uDepuo Peters nomasipala waseMnquma banike inkxaso kumashishini awohlukeneyo waseNgqamakhwe, Centane naseGcuwa.
UPeters ekunye noSodolophu waseMnquma, uTunyiswa Manxila-Nkamisa banike abanikazi bamashishini amancinane iimatshini zokucheba ingca, iifridge, izixhobo zokupheka ukutya eziquka iimbiza, izitovu neezinye izinto ngenjongo zokuxhasa amashishini wabo.
Ngexesha ethetha kulo msitho, uPeters uthe isebe lakhe linenkqubo yokuxhasa amashishini amancinane ingakumbi lawo azinze kwindawo ezisemaphandleni.
Kule nkqubo uthe ishishini ngalinye liye lifumane imali engange R10 thousand neliyisebenzisa ukuthenga izinto elizidingayo.
Uqhube wathi xa umntu efuna lenkxaso mali uye adibane nomasipala wendawo yakhe ukuze abhalise ze umasipala ugqithise ngeenkcukacha zakhe esebeni.
ISebe lona liye limthengele izinto azidingayo ezilingene lemali ingange R10 thousand.
Le nkqubo yesebe isetyenziswa ukhulisa amashishini asakhulayo asakuhlaleni ngokunokutsho kuka Peters.
USodolophu uManxila-Nkamisa uthe amashishini asakhulayo adlala indima kwicala lokhulisa uqoqosho lwasekuhlaleni.
Uqhube wathi bengumasipala bazimisele ukwenza ngako konke okusemandleni ukuxhasa wonke amashishini amancinane ukuze kuncipha izinga lendlala eMnquma.
Obambele njengo sihlalo wombutho wabathengisi zitalatweni eGcuwa, iMnquma Hawkers Association, uSangweni Ntlikithi ubulele umasipala waseMnquma nesebe ngalenkxaso ayifumeneyo amashishini asakhulayo.
UNtlikithi uthe ngexesha leCovid-19 bakhe batsala nzima bengosomashishini ngenxa yeemithetho eyayibekiwe eluqilima, kodwa umasipala waseMnquma uye wathi gqolo ebexhasa ngezinto ukuzwa bakwazi uqhubela phambili namashishini wabo.
