Kudutyulwe iPolisa ngethuba kuxhonyiswa iposi eNgqeleni

15 ISilimela 2023 – Monwabisi Khininda

Mpuma Kapa

Likwimeko ezinzileyo esibhedlele iPolisa elikwinqanaba lobuSajini elidutyulwe ngamadoda axhobileyo ngethuba kuxhonyiswa iposi kwidolophu yaseNgqeleni ngoLwesithathu weveki esisuka kuyo. Ngokwengxelo yamaPolisa esi siganeko senzeke ngaphambi kwasemini emaqanda kwisithuba sentsimbi yeshumi elinambini.

Isithethi samaPolisa ephondweni uWarrant Officer Majola Nkohli uthi amaPolisa ebesabela kwisiganeko ebesiqhubeka sokuxhonyiswa kweposi. Ngethuba egaleleka adibene neembila zithutha kwakhala iimbumbulu kuwo esikhumbeni. Aqikelelwa kwisixhenxe amadoda abexhobile akwazileyo ukuthatha isixa mali esingachazwanga ngaphambi kokubaleka ngesithuthi esiluhlobo lwe-Isuzu Bakkie emhlophe.

UWarrant Officer Khohli uthi eli Polisa lifumene umonzakalo kumzimba ongezantsi laze labalekiswa esibhedlele buphuthuphuthu.Kongezwe ityala lokuzama ukubulala kwelo lokuxhonyiswa kuxhotyiwe. Ingxelo iqhuba ithi ethubeni isithuthi ababaleka ngaso abarhanelwa sifunyenwe sishiywe kwilali yaseMabhetshe, eNgqeleni.

AmaPolisa acela nabani oneenkcukacha ezingakhokhelela ukuba kubanjwe abarhanelwa aqhakamshelane nesikhululo samaPolisa esikufuphi okanye achaze iinkcukacha ku-0860010111