Kusingathwe itumente yezemidlalo ukuzama ukuphelisa imilo
29 June 2023 – Monwabisi Khininda
EMajola
Iqale kakuhle itumente yezemidlalo ebanjelwe kwilali yaseMajola ngenjongo zokuphelisa imilo eqhubeka kule ndawo. Le tumente ebizwa ukuba yi’Phantsi iintonga’ iqale ngoLwesihlanu umhla woLutsha ukuya ngeCawa. Le midlalo iququzelelwe yiSONGE SOCIAL CHANGE ngokubambisana neSizwe Kupelo Foundation neTyeks Security Services.
Amaqela athatha inxaxheba kule tumente angaphaya kwamashumi amathathu kuquka namaqela ebhola yomnyazi.Imanejala yezonxibelelwano e-Songe Social Change uSiya Ndesi uthi le tumente ijolise ekuziseni uxolo ngemidlalo emva kwemilo ebiqhubeka kulalali. Ukwabalule ukubaluleka kokudlalwa kwemidlalo lulutsha lwaseMajola ukuzisa uzinzo.
USizwe Kupelo weSizwe Kupelo Foundation uthe: “Sesiqalile ukuthetha namaziko aphuhlisa izakhono. Sinesicwangciso seminyaka emihlanu singenelela apha. Sizokhuthaza ulimo kumanina, uphuhliso lwezakhono kulutsha, sithathe olunye ulutsha lujongelwe amathuba emisebenzi. Asinikwanga mali ngurhulumente.”
UMasixole Mbombo ongumntu omtsha uthethe wenjenje: “Le midlalo izodlala indima enkulu ekuziseni uxolo, ukugcina ulutsha luxakekile luhambele kude nolwaphulo mthetho. Siyayivuyela le midlalo kwindawo yethu yanga ingasoloko iqhutywa minyaka yonke. Sicela norhulumente angenelele ngenkxaso ukuze amaqela aphumeleleyo afumane inkuthazo,” Omnye umntu omtsha uOnele Manaba uthe ukuxakeka kolutsha lithemba lokuphelisa impi yeminyaka eMajola kubuyiselwe nethemba lokuphela kwempalalo gazi.
