Abahlali baseDrakenstein bathi Hayi kwisindululo sikaEskom sokunyuswa komrhumo woMbane wama-40%.
10 EyeDwarha (Oct) 2024 – 23 EyeDwarha (Oct) 2024
Intatheli kaDizindaba
Ngokubonakalisa ngamandla umanyano nokuzimisela, abahlali baseDrakenstein, bekhokelwa nguCeba Stephen Korabie, uSodolophu oLawulayo kuMasipala waseDrakenstein, bangene ezitalatweni zasePaarl ngentsasa yayizolo (30 Septemba 2024) bekhalazela uEskom wokunyuswa komrhumo wombane ngama-40%. Ngobukroti bemvula engayekeleliyo, abahlali babambe umngcelele ngoxolo edolophini, bezimisele ukuvakalisa inkxalabo yabo malunga nokwanda okugqithisileyo.
Lo mngcelele, oqale kwisikhululo sikaloliwe iHuguenot ePaarl East waze wayokuqukunjelwa eCivic Centre, awubonanga nxaxheba yasekuhlaleni kuphela kodwa ufumene inkxaso yeenkokeli zephondo. Phakathi kwabo bebezimase nguGqirha Ivan Meyer, uMphathiswa wezoLimo, uPhuhliso lwezoQoqosho noKhenketho eNtshona Koloni, othe wazibandakanya nabahlali kwisigqibo sabo sokuchasa isindululo sokuqhwalela kwezimali.
USodolophu oLawulayo uKorabie wayekhe wakuchasa ukunyusa okucetywayo kuka-Eskom, ebhalela ibhodi yeNational Energy Regulator of South Africa (NERSA) egameni labahlali baseDrakenstein. Kwileta yakhe, uqaqambise ifuthe elibi elinokubangelwa kukunyuswa kweerhafu kuluntu, ngakumbi kumakhaya anengeniso ephantsi esele itsala nzima.
“Unyuso olucetywayo alukho ngqiqweni kwaye luya kutyhala uninzi lwabahlali bethu kwiimeko ezimandundu apho kuya kufuneka bakhethe phakathi kokuthenga izinto eziyimfuneko okanye ukuhlawulela umbane. Kukwasebenza okufanayo nakumashishini asekuhlaleni, uninzi lwawo sele luselunxwemeni ngenxa yokunyuka kweendleko zokusebenza. Oku kuya kukhokelela ekulahlekeni kwemisebenzi ngakumbi,” utshilo uKorabie ngethuba lomngcelele.
Amabango oluntu anikezelwa ngendlela yoxwebhu lwezikhalazo, olwathi lwanikezelwa kuGqr Johan Leibbrandt, uManejala weSixeko kuMasipala waseDrakenstein. Uxwebhu lwezikhalazo, lusayinwe ngamakhulu abahlali, luhlaba ikhwelo ku-Eskom ukuba aphinde athathele ingqalelo ukunyuswa kwamaxabiso kwaye ajonge ezinye izisombululo ezizinzileyo kwimingeni yezamandla yelizwe.
Ebonakalisa ubumbano nabahlali abaqhankqalazayo, uGqr Leibbrandt watyikitya uxwebhu lwezikhalazo kwaye wafunga ukuba uza kuzisa ingqalelo ye-NERSA egameni loluntu lonke lwaseDrakenstein.
Njengoko umngcelele uqukunjelwa eCivic Centre, inginginya, imanzi te kodwa ingatyhafi, yayibeka yacaca into yokuba umlo wabo wokulwa nokunyuswa kwerhafu okucetywa nguEskom usekude ukuphela. Umyalezo ovela eDrakenstein wawumxhelo mnye: abahlali abasayi kuma ngelixa uluntu olusele lunengxaki yokujongana nobunzima bezemali.
