Kudutyulwe amapolisa amabini eMthatha 

Edition: 30 April 2026 – 13 May 2026  Intatheli: Monwabisi Khininda | Mthatha

Amapolisa aseMpuma Kapa angqinile ukuba ngamapolisa esikhululo saseMadeira kwicandelo labecuphi adutyulwe kwiveki ephelileyo kwindawo yaseNew Brighton kwilokishi yaseNgangelizwe eMthatha. La mapolisa kutyholwa ukuba ahlaselwe esuka emsebenzini ehamba ngesithuthi esingenamibhalo.

Isithethi samapolisa ephondweni uBrigadier Nobuntu Gantana uthe elinye ipolisa linabele uqaqaqa kwindawo yexhwayelo logama ipolisakazi likwimeko engaginyisi mathe esibhedlele.

Amagama amapolisa asagodliwe de kugqitywe inkqubo yokwaziswa kwezihlobo zawo. Nabani onganolwazi ngoluhlaselo uyacelwa aqhagamshelane namapolisa kuCrime Stop ku-0860010111 okanye kuMySAPS App.