UMphathiswa nenxaki yoonoteksi

12 EyeDwarha 2023 – Anele Raziya

MPUMA KOLONI

Njengokuba zindlangile iziganeko zokubulalana koonoTeksi kwiphondo laseMpuma Koloni, uMphathiswa weSebe leZothutho noKhuseleko Loluntu, uXolile Nqatha ukhangela isisombululo sale ngxaki.

Kwinyanga ephelileyo ziye zaxhaphaka ngamandla iziganeko ezichaziweyo zoonoteksi abaye badutyulwa babhubha abanye bonzakala ngenxa yesizathu esingaziwayo.

Ezinye zeziganeko zenzeke eMnquma kwidolophu yaseGcuwa, eNgqamakhwe kuquka nakwezinye iindawo ephondweni.

Kangangokuba lonto iye yenza ukuba kubekho izityholo ezicinga ukuba kukhona idabi elikhoyo phakathi koonoteksi nangona kungaziwa ukuba libangelwe yintoni okwangoku.

UMphathiswa uNqatha ekunye negqiza lakhe baye baphakama bacela indibano neenkokheli zombutho woonoteksi iSANTACO eMthatha ngenjongo zokuqinisa ubudlelwane phakathi kwesebe lakhe neemibutho yoonoteksi.

Ngokwengxelo yesebe, kule ntlanganiso kuye kwaphakanyiswa imiba eliqela efuna uqwalaselwa kwaye kwajongwa nezisombululo yalo miba.

Oka Nqatha yena uye wavakalisa inkxalabo kwinto yokubulalana okuthe gqolo kusenzeka kwicandelo loonoteksi eMpuma Koloni.

Uthe uxhalabile yimeko yokubulalana kwicandelo lezothutho kwaye uhlaba ikhwelo ukuba wonke umntu ochaphazelekayo ukuba kuncediswane ukunqanda lento imbi kangaka.

Ngexesha kuqhuba intlanganiso kuye kwabakhona ithuba lokuba kuthotywe iintloko ngeli hlonipha abanooteksi abathe baphulukana nobom babo kweli candelo lezothutho.

Okwangoku ayikabikho ingxelo ecacileyo echazayo ukuba bangaphi oonoteski esele bebulewe okanye abonzakeleyo kweli candelo lezothutho.

Kodwa kwinyanga ephelileyo kwindawo yaseMnquma kulapho bezindlange khona ezi ziganeko zokuhlaselwa koonoteksi kwade kwabulawa ababini kubo.

Kuyo yonke imiba ibixoxwa kwintlanganiso kuyavakala ukuba uNqatha neSANTACO namanye amacendelo ebeyinxalenye baphume bethetha ngazwinye.