Ulutsha luzibhubhisa ngokuzala neziyobisi

7 March 2024 – Monwabisi Khininda

Abahlali basePolar Park eMthatha bamemelela kumasipala waseKing Sabata Dalindyebo (KSD) ukuba wenze unako nako ukulwa imiceli mngeni abajongene nayo abantu abatsha balendawo.

Le ndawo yayifudula isaziwa njengendawo yeembacu, ezagoba amatyholo, ngenxa yokusondela kwayo kwintolongo yaseWellington. Yonganyelwe kukusetyenziswa gwenxa kweziyobisi, ukuzibhubhisa ngotywala,ukuzingxixha ngokukhulelwa kwabantwana abaselula nentlupheko edalwa yintswela ngqesho. Kwiveki ephelileyo umasipala wase-KSD ebambisene neSonge Social Change, Eastern Cape Liquor Board, Humana namanye amaqumrhu angekho phantsi korhulumente bebesingathe umsitho wokufundisa ngezinto eziquka ukuxhatshazwa kwamanina nabantwana nezinye ezidinga ingqwalasela yokuphucula intlalo yale ndawo.

USithembukuhle Ndumiso obethethela ulutsha uthe:- “Ingxaki esinayo kukusetyenziswa kweziyobisi,ukuyeka phakathi esikolweni nezinye. Sicela umasipala angenelele ancedise ulutsha ngezakhono kuliwe intswela ngqesho egqubayo nokukhulelwa kwabantwana beselula”. Umzali ungavumanga ukuba igama lakhe lipapashwe uthethe wenjenje:- “Sivuyile ukufika kukamasipala wase-KSD apha kwawadi 12, sishiyeke sinethemba xa ethembisa ngokubuya. Singengxaki yeendawo zentselo ezivula ubusuku bonke. Amapolisa ayafika athi axelelwe ngubani ngomzi othengisa iziyobisi.Sinengxaki yabantu abangenazo izazisi zokuzalwa,omnye uphuma ejele azohlala apha azale abantwana yande indlala.

Abahlali bacele lo masipala akhwebe isebe leZekhaya lizonceda ngezazisi ePolar Park. Ilungu lekomiti kaSodolophu e-KSD uNoluyolo Mayi uhlabe ikhwelo kubahlali ukuba bamanyane babeyimbumba yamanyama ukulwa iingxaki abajamelene nazo.