Ukonyuka kombane kuthiwa kuzakuba negalele elikhulu kwabo basokolayo
ED Mangxaba
Abahlali bavakalise ukungonwabi kukunyuswa kwexabiso lombane nguEskom kutshanje. Bathi abemi beli lizwe lo “chintsi” kwi xabiso lombane lizakuba nefuthe elibi kakhulu kwaba bangathathintweni. Kuvakala okokuba lo “Funqu” kwi xabiso lombane uye waphunyezwa emveni kokuba iqumru lezamandla uNERSA liye lamvumela uEskom ngoku kunyusa ixabiso lombane.
Bona abasemfuthweni wolwazi bezazi neendaba bavakalise okokuba lo “Funqu” kwi xabiso lombane ubangelwa kukulambatha kwezimali kwa Eskom. Aba bazise okokuba oku kuzakuba negalelo elikhulu kwabo basokolayo nabebesoloko bekhala nangalo “cimi cimi” nangona ebekhe wanqaba kwii ntsuku ezidlulileyo.
Okoyikisa abasemfuthweni wolwazi kwakho ngalo mba kukuba oku ngahle kubenegalelo kwabo basokolayo kuba kakade bebesoloko bekhala ngokufumana ii units ezimbalwa nokuba bebesoloko bethenga umbane ngee R50 ngeveki. Kuphinde kuvakale okokuba lo “cimi cimi” ebedlala indima enkulu ekusokoleni kwa bantu.
Wona umbutho woo somashishini abazimeleyo iPublic Enterprise Portfolio Committee uvakalise inkxalabo yawo ngoku. Isithethi salo mbutho, umnumzana Elphas Buthelezi uthethe wenjenje: “Oku kuzakuzisa intsokolo enkulu kubemi beli lizwe esele ikudala batsala nzima okokoko kwathi kwangena loRhulumente ukhoyo. Sino Rhulumente ongenalulawulo lululo kuba phaya ezikhundleni ezikhulu kukho abantu abangazinje kwanto ngalawulo olululo. U Eskom usokola hayi ngokuba akanamali, koko lulawulo lwabantu abangazi nto tu ngolawulo. Inye into ebangela lo “Duntsu Bhaka” kwa Eskom lurhwaphilizo olukhulu olwenziwa ngabantu abangakathaliyo ttu ngabo basokolayo. Yonke le ngxaki eqhubekayo kwa Eskom yenziwa kukuba eli qhumru liphethwe ngabantu abangazi nto tu ngolawulo,” utshilo lo ka Buthelezi.
Kuvakala okokuba phaya koo Guguletu, Nyanga, Langa nase Khayelitsha kukho abantu abasokolayo ukuthenga umbane nkqu nange R20 ngenxa yentsokolo kuba bengaphangeli. Uninzi lwabo lukhala ngelokuba le ngxaki iphinda yongezwe ngu “Nyi” kuloo R20 kuba ezi spaza shops zabemi bangaphandle ziphinde zongeze enye imali.
