Amapolisa adubule abulala abaphangi abahlanu 

22 EyeThupha (Aug) – 28 EyeThupha (Aug) 2024

Monwabisi Khininda

Amapolisa ecandelo looKhetshe neqela le TRT (Tactical Response Team) eMpuma Kapa adubule abulala oonqevu abaxhomisa iimoto zemali aze abamba amadoda amane kuxhomiso obeluqhubeka eMacleantown ngoMvulo weveki ephelileyo.

Isithuthi sakwa-SBV siye saxhonyiswa kuhola wendlela u-N 6 phakathi kweMonti neCumakala. Oonogada abathathu baye bonzakala kolu hlaselo yaze imoto ethwele imali yalala ngecala. Nemoto ebipheleke esi sithuthi nayo ihlaselwe ngeembumbulu. Abarhanelwa baye babaleka nesixa mali esingachazwanga, baze bashiya ngasemva izithuthi ezithathu. Ezi zithuthi zichazwa njengezebiwe kwamanye amaphondo. Kwindawo yexhwayelo kuye kwafunyanwa neziqhushumbisi. Amapolisa afumene umkhondo osingise kumzi othile eKesikammahoek.

“Amapolisa ahlangatyezwe yimvula yembumbulu kwaze kwanyanzeleka ukuba amapolisa aphendule ngeembumbulu.Kuye kwasweleka abarhanelwa abahlanu,konzakala abane,” kucacisa uCapt. Yolisa Mgolodela osisithethi sooKhetshe eMpuma Kapa. “Amapolisa afumena imali esezingxoweni, imipu ye-AK 47 emithathu,umpu wohlobo lwe-R1,imipu ye-R5 emine neembumbulu.

Indoda enamashumi amahlanu eminyaka iye yavalelwa.Izakuvela kwinkundla kaMantyi eQonce kungekudala. “Uphando lwamapolisa lukhokhelele ekubanjweni kwabarhanelwa abathathu abehamba ngemoto ebikrokreleka yohlobo lwe-Porsche enenombolo mbhalo waseGoli (GP), phakathi kweKomani neNxuba (Cradock),”kucacisa uMgolodela. Amapolisa afumene imali ezizitaki ze-R100 neR200 ikwingxowa ebihanjiswa ngazo;iifowuni ezine nePorsche Cayene.” Le moto eyiPorsche kufumaniseke ukuba yebiwe eGoli. Abarhanelwa abathathu bazakuvela emaplangeni kwinkundla kaMantyi waseNxuba kungekudala.