Kudutyulwe omnye umphangi kuTsolo
10 EyeDwarha (Oct) 2024 – 23 EyeDwarha (Oct) 2024
Monwabisi Khininda
Iya iqheleka into yokuzithemba koonqalintloko kweliphondo le Mpuma Kapa. Kwiveki ephelileyo amapolisa adubule imiguvela emibini yaya kwantsonganyawana, le miguvela ibiqokelela yentlawulo yokhuseleko (protrction fees) koosomashishini kwindawo yakuNgcingane kwingingqi yakuGaduka cebukuhle nedolophu yaseMthatha.
Abanqevu bamiswa ngamapolisa,endaweni yokuba bathobele umthetho bakhupha imikhono yekati bajolisa emapoliseni bedubula, kanti bazakudibana neembila zithutha. Kwiveki ephelileyo ngoLwesine kuphinde kwaduma izulu lezandla phakathi komtyholwa namapolisa kwindawo yaseNtshiqo kwisiphambuka saseNgcolosi kuTsolo.
Lo mrhanelwa kudala ekhangelwa ngamapolisa. Amapolisa athiwe thsuphe ngobukho bakhe.Uthe akubona amapolisa waqonda ukuba utshelwa zizicheku waqalisa wadubula emapoliseni. Amapolisa awaphozisanga maseko aye aphendula ngezawo iimbumbulu waze wachanwa itshola lalala umbethe. Kwiveki ezimbini ezidluleyo kwakule dolophu yakuTsolo kwandlandlathekiswa esinye isijem-jem ngelophisi langcol’ungele nakwindawo Qoboqobo le mikhuthuka yazama ukuzilwela emapoliseni kanti kukuyodibana nooyisemkhulu ingabhungisanga.