Abantu abakhubazekileyo bafuna ufikelelo olungcono kwizithuthi zikawonke-wonke
14 EyeNkanga 2024 – 27 EyeNkanga 2024
Intatheli: Mary-Anne Gontsana
Iqela leNguqulelo yabaKhubazekileyo lifuna ukuba iSixeko saseKapa siquke imilinganiselo ethile yabantu abakhubazekileyo kucwangciso lwaso lwezothutho
“Izithuthi zikawonke-wonke kubantu abakhubazekileyo liphupha elibi,” utshilo uPhakama Zembeta, umama womntwana okhubazekileyo.
“Kubi kakhulu ukuba siye sabhenela ekusebenziseni iimoto ze-e-hailing qho xa efuna ukuya ekliniki ezixabisa kakhulu kwaye ngamanye amaxesha angathembekanga,” utshilo umama wase-Eerste River.
Wayephakathi kwabantu abamalunga nama-50 abathi, ngaphandle kwengqele nemvula, baphuma besiya kwipikethi ekhokelwa ngumbutho woKhubazeko lwabaKhubazekileyo eCivic Centre yaseKapa. Bathi isiCwangciso sezoThutho esiDibeneyo esiBanzi seSixeko saseKapa sika-2023-2028 (CITP) asibandakanyi isicwangciso esingqalileyo sabantu abakhubazekileyo, ingakumbi abasuka kwiindawo ezihlelelekileyo namatyotyombe.
UZembeta nabanye abaqhankqalazi bathi isicwangciso asiphumeleli “ukukhankanya abantu abakhubazekileyo kumatyotyombe, abaphakathi kwabona bantu basesichengeni esixekweni”. Bafuna ukuba isiXeko sihlaziye i-CITP ukuze iquke isicwangciso esithile sokufikelela kwezothutho kubantu abakhubazekileyo abasematyotyombeni. Bakwathi khange kuthethwe nabo ngokwaneleyo malunga nesicwangciso soshishino esitsha seDial-A-Ride.
“Akumele kube nzima ngolu hlobo kubantu abakhubazekileyo ukusebenzisa izithuthi zikawonke-wonke. Urhulumente akenzi ngokwaneleyo,” utshilo uZembeta.
Njengoko iqela lingena kwi-Civic Centre, usihlalo weKomiti ye-Oversight Committee ye-Urban Mobility, uMikhail Manuel, weza kuhlangana nabo ngokufutshane.
Osebenzisa isitulo esinamavili uSiyabonga Majozi waseLower Crossroads uxelele uManuel ukuba akukho sidima xa uthatha izithuthi zikawonke wonke njengomntu okhubazekileyo. “Ungama ecaleni kwendlela, kwaye ubonise iteksi, kodwa iya kudlula ngokungathi awubonakali.
“Xa omnye esima aze andikhwelise, umqhubi uba krwada. Ngesinye isihlandlo omnye umqhubi wandixelela ukuba isitulo sam esinamavili sithatha indawo yomnye umkhweli.”
UMajozi uthe ukuhamba ngololiwe akuyonto anokukhetha kuyo kuba izikhululo ezininzi azikabinazo iindawo ezinyukayo ezifanelekileyo okanye iilifti zokusebenza. “Khawufane ucinge ukuthwalwa ngabantu ongabaziyo ngathi yingxowa yeetapile ukuze ungene kwizithuthi zikawonke-wonke,” utshilo uMajozi.
Iziphakamiso zeqela zamkelwa kwaye zasayinwa nguManuel.
