Bezime ngxii iinkonzo kwidolophu yaseXhora

February 16, 202511 months Dizindaba 223 Views

13 EyoMbumba (Feb) 2025 – 26 EyoMbumba (Feb) 2025

Intatheli: Monwabisi Khininda

Uqhankqalazo lwabahlali luzimise ngxii iinkonzo kwidolophu yaseXhorha,kutsha nje.Abahlali bebekhala ngemeko esebugxwayibeni yeendlela ezingahambekiyo kulaa mmandla. Olu qhankqalazo luchaphazele iinkonzo ezingundoqo ekuquka kuzo ukufunda nokufundiswa kwabantwana,ezoshishino lwetekisi, iivenkile zokutya nezempahla yokunxiba,iimpahla yokwakha njalo-njalo.

“Silinde uMphathiswa wesebe lezoThutho kwiphondo leMpuma Kapa uXolile Nqatha, sifuna azosixelela ukuba le ndlela yaseXhorha izakulungiswa nini,” itshilo inkokheli yabahlali engakhange ivume ukuba igama layo lipapashwe. Olu qhankqalazo luqale kwisiphambuka sakuGogozayo esidibanisa indlela ephakathi koMqanduli neXhorha. Nakwicala elisuka eMthatha kwindlela engena eQunu ukuya eXhorha bekuvaliwe. Abaqhankqalazi baye banyanzelisa ukudibana nabasemagunyeni kurhulumente wephondo.

Kusenjalo abahlali baseNgqwarha eMqanduli bafake uxwebhu lwezikhalazo kumasipala waseKing Sabata Dalindyebo bekwakhalazela iindlela ezonakeleyo.