Kudutyulwe kwabulawa amalungu osapho eMaxesibeni
30 EyoMqungu (Jan) 2025 – 12 EyoMbumba (Feb) 2025
Intatheli: Monwabisi Khininda
Kulindeleke ivele enkundleni yamatyala eMaxesibeni kule veki indoda eneminyaka engamashumi amahlanu ubudala kulandela udubulo olushiye kubhubhe amalungu osapho amabini aphakathi kweshumi nesithandathu namashumi amathathu anesithathu ubudala.
Olu dubulo lwenzeke ngoLwesihlanu weveki ephelileyo, ngethuba amadoda amane axhobileyo egaleleke engabhungisanga kumzi othile kwilali iMkhambathini eMaxesibeni eMpuma Kapa. Kuvakala ukuba amalungu osapho ebelele kwizindlu ezimbini ezahlukeneyo ngethuba abanqevu abebezibhongxe ngeebhalaklava bangene kwenye yazo badubula babulala amaxhoba amabini.
Ingxelo ithi kwenye indlu badubule bonzakalisa abantu abane abaphakathi kweminyaka engamashumi amabini ukuya kumashumi amahlanu anesixhenxe ubudala,bakwimeko emandundu esibhedlele. Isithethi samapolisa ephondweni uLieutenant Colonel Siphokazi Mawisa uthi ukuzimisela kwamapolisa kukhokhelele ekubeni kubanjwe umrhanelwa. Ujongene namatyala amabini okubulala namane okuzama ukubulala.
Amapolisa asaphica abanye abarhanelwa abathathu abasagcwele amathafa.Kucelwa nabani onnenkcukacha ezingakhokhelela ekubanjweni kwabanqevu bathathu atyelele isikhululo samapolisa esikufuphi kungenjalo atsalele umnxeba ku-SAPS Crime Stop number-0860010111.
