Ibuyile imidlalo yeMnquma LFA kwimpelaveki egqithileyo.

Ngu Anele Raziya 

Iphinde yabuya imidlalo yeMnquma Local Football Association (Mnquma LFA) eGcuwa emva kokuba ibikhe yamiswa iveki ezimbalwa ebutsheni balo nyaka. 

Enye yengxaki ebibangela ukumiswa kwale midlalo yeMnquma promotion league U/21 ibingamaqela ebesoloko engazimasi imidlalo yawo ngaphandle kwezizathu ezibambekayo. 

Lonto iye yabangela ukuba amaqela amaninzi kwiMnquma LFA azibhaqe sele efumana amanqaku amathathu (soft points) ngaphandle kowasebenzela ebaleni. 

IMnquma LFA kuye kwanyanzeleka ukuba ikhinqe lomaqela aziphithe ngendlela engafanelekanga kwileague emva koko kwaphinda kwaqhutywa neemidlalo ngempelaveki esiphuma kuyo. 

IRafa Bees FC, FC Montego, Eleven Hunters FC ne 6lX 4our SC FC, ngawo onke amaqela aye agxothwa ngumbutho webhola eGcuwa iMnquma LFA emva kokuba efumaniswe engakwazi ukuziphatha kakuhle kwileague. 

Lonto yathetha ukuthi kushiyeke amaqela alishumi elinanye (11) kwi promotional league nazakuthi akhuphisane kude kuphele isizini. 

Ukhutshwa kwala maqela mane kuluhlu lamaqela adlala kwiMnquma promotional league U/21 kuye kwashiyeka iqela elibizwa EzikaXhamela FC lihleli kwindawo yokuqala kwilig ngamanqaku angama21 (points) kwimidlalo elithoba. 

Kwindawo yesibini bekuhleli iMnquma Hotspurs FC ngamanqaku alishumi elinesibini (12) emva kwemidlalo emihlanu. 

Logama kwindawo yesithathu kuhleli iFingo United FC ngamanqaku alishumi kwimidlalo elishumi esele iyidlalile kule sizini. 

Ngexesha kubuya imidlalo ye promotional league ngempeveki, i-Ambitious F.C izibethele iMnquma Hotspurs FC ngo 1:0, Young Stars United yabetha FC Tshabalala ngo 1:4, Fingo United yadlala ntanganye ngo1:1 ne Future United. 

Kumdlalo ubengosuku lwangeCawe iFingo United  ibethe Fingoland FC ngo 4:0 emva kwemini. 

Ukanti kule mpelaveki kulindeleke ukuba iqhubekeke imidlalo yeMnquma promotional league kwaye amaqela ayakhuthazwa ukuba afike kwangexesha emabaleni.