Intatheli: Anele Raziya
I Young Africans FC yelali yaseNgadla kuGatyane iphumelele itumente ebizwa iZ. Black Aces tournament ngampelaveki esiphuma kuyo.
Abathandi bebhola ekhatywayo kwiindawo ezahlukeneyo eMbhashe bebengungelene kwilali yaseQwaninga kwiKomkhulu kuGatyana ngempelaveki beyokuxhasa itumente yebhola ebizwa Z. Black Aces tournament nebijolise ekuphuhliseni imidlalo kwaye ichasene nolwaphulo mthetho. Inkosi yelali yaseQwaninga uZanenqaba ebephakathi kwalo nginginya yabantu ebebonwabele imidlalo uqala ngosuku langoMgqibelo uyokuma ngeCawe. Ngamaqela alishumi elinesixhenxe (17) ebephuma kwindawo yaseMbhashe naseMnquma abeyinxalenye yale tumente ibisindlekwa isihlandlo sesibini oko yasungulwa kunyaka ophelileyo. Amaqela ebhola ekhatywayo aye anyathelana kwanzima kwibala laseQwaninga Komkhulu kwade kwashiyeka amane aquka i-Young Africans FC, Abatshana FC, Qora Tigers FC neBhantinti. Kwimidlalo eyandulela owamanqam, Young Africans FC izibethele Bhantinti ngo1-0 ukuzibekela indalo kumdlalo wamagqibela kankqoyi. Lo gama Abatshana FC bekhinqe iQora Tigers FC ngo5-4 kwipenalthi emva kokuba bedlala ntanganye ngeqanda (0-0) macala emdlalweni. Kumdlalo wamanqam oqhube kwade kwacaba kuyarhatyela ngosuku lwangecawe, Young Africans FC yelali yaseNgadla kuGatyane iphumelele ngegowuli elinye eqandeni (1-0) ibetha Abatshana belali yaseQwaninga. Ngokuphumelela itumente, Young Africans FC igoduke iphethe ibhaso lemali engange R5000, ikiti entsha kraca, iimbasa zegolide kunye nendebe. Abatshana FC ababethiweyo kumdlalo wamanqama baxoliswe ngokunikwa ibhaso lemali engangeR2000, imbasa zesilivere kunye nekiti entsha kraca. IQora Tigers FC egqibe kwindawo yesithathu kule tumente iye yanikwa ibhaso lemali engange R1000 kunye neembasa zebronze. USihle Yoko obengomnye wabaququzeleli, uthe injongo ngale midlalo bebefuna ukhuthaza ulutsha ukuba luhambele kude kwiziyobisi nakwizinto ezidibanisele nolwaphulo mthetho. “Injongo zale midlalo sifuna ubanogalelo kwicala lokuphuhlisa imidlalo ezilalini kwaye sikwazama ususa ulutsha kwiziyobisi nakwizenzo zolwaphulo mthetho,” kutsho uYoko. Uqhube wathi imidlalo iye yaqhuba kakuhle intsuku zombini kwaye khange kubikwe nesinye isiganeko. Uye wabulela nenkosi yeyali uZanenqaba othe gqolo ukuxhasa iZ. Black Aces tournament ngenjongo zokususa ulutsha kwiziyobisi nakwizenzo zolwaphulo mthetho.
Kunyaka ozayo uthe uYoko itumente iza kuphinda ibuye kwaye uyathemba ukuba izakuphinda intsale umdla nangakumbi kuluntu njengoko bekugcwele nabazali kulena bezokuxhasa abantwana babo emidlalweni.
