IContralesa ichasene nokubekwa kweNkosi yaseNayijeriya kuGompo
Edition: 26 March 2026 – 15 April 2026
Intatheli: Monwabisi Khininda | Mpuma Koloni
ICONTRALESA ayikonwabelanga ukubekwa kweNkosi yaseNayigeriya (Nigeria) kuGompo kwiveki ephelileyo. Ngomlomo kaNkosi Mwelo Nonkonyana uthe ukubekwa kukaNkosi Solomon Ogbonna Eziko kuGompo kusisithuko kuKumkani Sandile wamaRharhabe kwaye kungaxhokonxa ukungquzulana phakathi kwabemi beli lizwe nabaphambukeli. UOgbonna ubekwe njengeNkosi yesizwe samaIgbo kwidolophu yakuGompo. UNkosi Nonkonyana uthi esisenzo sitsibe ilitye likaPhungela sibonakalisa ukungayihloniphi iKumkani yesizwe samaRharhabe.
UNonkonyana uthi olubeko lungavusa udushe phakathi kwabantu abahlonipha amasiko esintu nobuKhosi bamaKhoisan. Uhambise wathi iContralesa uzawulubika oludana kwisebe leMicimbi yaMazwe ngaMazwe esongeza ngelithi ingabonzakalisa ubudlelwane phakathi koMzantsi Afrika nelizwe laseNayijeriya. UVuyo Zungula oyinkokheli yombutho i-ATM (African Transformation Movement) uthe ukubekwa kweNkosi yaseNayijeriya kuGompo isisithuko kubemi beli lizwe nenkokheli zemveli.
UZungula utsho ememelela kwiNkulumbuso uOscar Mabuyane nesebe leMicimbi yezeKhaya uMphathiswa uLeon Shreiber baphande. Uthe makuqinisekiswe ukuba akukho mithetho yophuliwe na ngesi senzo ukuze kukhuseleke abantwana begazi. Abemi baseNayijeriya bona ababoni sikhwasilima kwesi senzo kuba bathi babhiyozela inkcubeko yabo neminyaka eliqela behleli kweli lizwe.
UMphathiswa wakwa-COGTA eMpuma Kapa uZolile Williams ukuchasile ukubekwa kwaleNkosi yaseNayijeria esitsho esithi ibeyindelelo kwinkululeko yeli lizwe kwaye abantu abenze esi senzo kulindeleke bajongane nengalo yomthetho. UWilliams uthi isebe alikhokheleyo neNdlu yeNkosi neeNkosi zamaKhoisan ziyalinyhasha elinyathelo.
UNkosi Mpumalanga Gwadiso onguSihlalo weNdlu yeNkosi namaKhoisan bayasigxeka esi senzo. Uthe elinyathelo lophule umthetho kwaye abawusangaso umthetho weli lizwe. Uthe amapolisa mawenze uphando athathe amanyathelo ngesi senzo. Ezingene mva zidiza ukuba kuzobanjwa umngcelele kuGompo ngomhla we-30 kweYokwindla.
