Kukhalinywa ukuxhatshazwa kwamalungu eLGBTQI+

28 EyeNkanga 2024 – 11 KweyoMnga 2024

Intatheli: Monwabisi Khininda

Umasipala wase-King Sabata Dalindyebo ukugxekile ukuphathwa gadalala, kubethwe kudlwengulwe amalungu e-LGBTQI+ kummandla waseMthatha. NgoLwesihlanu esisuka kuye, yinginginya yabantu ebiphume ngobuninzi bayo kummandla waseMthatha ukuza kubayinxalenye yomngcelele ochasene nalo mkhuba wokuxhatshazwa kwabathandana besisini esinye.

Lo mngcelele uqale eNelson Mandela Museum ukungena kumbindi wedolophu. Umgaqo siseko woMzantsi Afrika uvumela umntu ilungelo lokuzikhethela iqabane lakhe ngaphandle koloyiko, ukucalu-calula nezinye. Ilungu lekomiti kasodolophu elijongiswe iSpecial Programmes e-KSD uAndiswa Ketse uthi baqaphele ukuba amalungu e-LGBTQI+ athathwa njengabantu abangaphiliyo ekuhlaleni ngenxa yentiyo. “Bayaxhatshazwa, bayadlwengulwa, bayabethwa babizwa ngamagama angamkelekanga. Lo mngcelele ibiyindlela yokuba baziveze ukuba ngabantu abaphilayo nabo e-KSD.Sifuna onke amacandelo azothetha ngalemeko,”kutsho uKetse.

USihlalo we-Gender Forum e-KSD uThwasa Nombewu uthe: “Amalungu e-LGBTQI+ ayacalucalulwa,abethwe,adlwengulwe.Loo nto isichaphazela engqondweni, abanye bayazibulala ngenxa yokungamkeleki kwiintsapho zabo ngendlela abadalwe ngayo.” Lo msitho uqukunjelwe ngenkqubo yezithethi nolonwabo apho bekukho iimvumi eziquka uMfana ongenankinga nabanye. Phakathi kwamaqumrhu axhase lo msitho yiSONGE SOCIAL CHANGE, SHE, Generation G, TB HIV Care namanye.