Umgulukudu wepolisa udutyulwe wabulawa ngamanye eMqanduli
14 EyeNkanga 2024 – 27 EyeNkanga 2024
Intatheli: Monwabisi Khininda
Ipolisa elikwinqanaba leSajini ebelingekho semsebenzini lidutyulwe ngamanye amapolisa lwangcol’ungele.Ingxelo zithi eli polisa belisebenza kwisikhululo samapolisa saseMadeira kwidolophu yaseMthatha. Lo nqevu wepolisa udutyulwe kudubulwano necandelo lamapolisa elibizwa iTactical Response Team kwindawo yaseMqanduli emalanga ngoLwesibini weveki ephelileyo.
Kutyholwa ukuba kwisithuba sentsimbi yesine malanga,amapolisa e-TRT alandele iinkcukacha ngabarhanelwa abaxhobileyo kummandla waseMqanduli. Ngokutsho kwengxelo akwazile ukufumana abarhanelwa kwindawo yentselo kwilali yakuDobe. Ingxelo iqhuba ithi ngethuba abarhanelwa bebona amapolisa bathe sa-a-a okwamantshontsho ezagwityi babalekela kumacala awohlukeneyo. Umrhanelwa omnye obesemnyango uqale ukudubula emapoliseni e-TRT. Abuyisa ngeembumbulu nawo kwaqhuma uthuli kwanuka irhuluwa, amgqithisa amafu ngoko nangoko.
Lo mrhanelwa oneminyka engamashumi amane anesibini ubudala uthe wabulawa lo gama abanye bekwazile ukubaleka ngathi bemka nomoya baphela emehlweni. Isithethi samapolisa uWarrant Officer Majola Nkohli uthi uphando lokuqala luntame ukuba umpu ofunyenwe kweli polisa webiwa eHillbrow eGauteng, ngomnyaka wama-2021.
UWarrant Officer Nkohli uthi emva kophando kuvele ukuba eli polisa nguSajini kwisikhululo samapolisa eMadeira eMthatha. Okwangoku belingekachazwa igama lelipolisa elitshabileyo.
