Isebe leDSRAC lixhasa ababhali besiXhosa
13 EyoMbumba (Feb) 2025 – 26 EyoMbumba (Feb) 2025
Intatheli: Monwabisi Khininda
Isebe leZemidlalo, uBugcisa neNkcubeko kwinjongo zalo zokugcina isiXhosa singemki nomsinga lixhasa ababhali ngokuthi libapapashele iincwadi ze lizinikezele kubabhali. NgoMvulo weveki ephelileyo elisebe linikezele iincwadi ezingamashumi alithoba kuMonwabisi Khininda. UMonwabisi (62) wazalelwa eLukhanyisweni kumaMpondo aseNtshona,eLibode. Le ncwadi inikezelwe kwisikolo iBhekizulu eLibode ngethuba ebenikezela ngezixhobo, iibhola kubantwana besikolo,kwiphulo leBack-to School.
UMphathiswa uSibulele Ngongo owayefunda kwesi sikolo ukhuthaze abafundi ukuba babhale ngesiXhosa nezinye iilwimi zesiNtu ukuze kugcinakale imbali nenkcubeko yesiNtu. “IMpuma Kapa yaziwa ngokuvelisa ababhali abango S.E.K Mqhayi, Ncedile Saule,uNoni Jabavu nabanye. “Ukuba sifuna ukubhala ngokutsha imbali yethu iqala ngabantu beliphondo babalise amabali abo ngeelwimi zabo”.Incwadi ezingamashumi amabini anesibini ezachongwa ukuba zipapashwe lelisebe zichaphazela imixholo equka ukuxhatshazwa kwamanina nabantwana, zibhalwe ngesiAfrikaans, isiXhosa, iseSotho nesiNgesi. Isebe lizakuzisasaza zibekhona kumathala eencwadi ze ziyoboniswa kwiNational Arts Festival eMakhanda kulonyaka nophehlelelo lweNgxoxo ngoBumbano loLuntu (Social Cohesion Dialogue) ngoMatshi walonyaka.
“Sifuna ukuqinisekisa ukuba zonke iilwimi ziyaxatyiswa,ziqatshelwe ze zigcinelwe izizukulwana ezizayo,”kutsho uNgongo.Incwadi kaKhininda wayeqale ukuyibhala njengomdlalo kanomatrhotholo kukhuphiswano loMhlobo Wenene FM phantsi kwesihloko esithi #UWFM Drama ngonyaka ka-2022.Ingenelo lakhe laphuma kwindawo yesibini elandela umbhali wemidlalo yeqonga neencwadi uNompumezo Buzani waseGqeberha. UKhininda zange atyhafiswe kukungaphumeleli kwengelo lakhe waye wawukhulisa lo mdlalo wabhala incwadi ethi Ndinje Nje Andizenzanga.
Le yincwadi yesithandathu kaKhininda okwangumsunguli nomhleli wephephandaba iKhwezi News elizinze eMthatha. “Sendinikezele ngeencwadi eziliqela kumathala eencwadi eMthatha. Ndinqwenela ukubona ababhali abakhulayo besiXhosa.” Isebe lakwaDSRAC lachonga iincwadi ezingamashumi amabini anesibini kwimibhalo ngqangi elikhulu elinamashumi alithoba ananye (191) ngonyaka ka-2024,phakathi kwayo kukho ababhali abaziwayo abaquka uNjingalwazi Peter Tshobisa Mtuze owaye wawongwa kwiEastern Cape Provincial Book Fair ebiseMonti kuOktobha wonyaka ophelileyo.
Omnye umbhali opapashelwe incwadi yakhe yintatheli ezimeleyo uZavela Makwabe (37) waseMiddledrift opapashelwe incwadi ethi Oxhel’eyakhe Akabuzwa. “Bambalwa abantu bebengazinto ngalencwadi yade yabe iyapapashwa ndaze nayazisa kuFacebook.Kungekudala zingenile iodolo zabantu abafuna ukuyithenga. Ndibenemincili ngumdla abawubonakalisileyo kwincwadi yam yokuqala,” kutsho uMakwabe.
