UGodongwana usibhanxile-itsho ikomiti ye-SATBVC
Intatheli: Monwabisi Khininda |
Avakalise ukungoneliseki yindlela uMphathiswa weZimali uEnock Godongwana awuphendule ngayo umba wemali zomhlalaphantsi zamababefudula bexelengela oorhulumente bamaphandle i-TBVC (Transkei, Bophuthatswana, Venda neCiskei). UMphathiswa uGodongwana ebeyonika ingqwalasela kwiholo yesithili i-O.R Tambo eVulindlela Heights eMthatha kwiveki ephelileyo. Amaxhego namaxhegwazana ebephume ngesininzi ezosabela kwisikhalo semali zawo ezingazange zibhatalwe zonke ngurhulumente wedemokrasi. Le ntlanganiso ibizinyaswe nabubukho boMphathiswa wesebe leZimali noPhuhliso loQoqosho eMpuma Kapa uMlungisi Mvoko. NoSekela Mphathiswa weZokhuseleko nemicimbi yamaGqala uMajor General Bantu Holomisa ebekhona nangona engakhange awuvule owakhe umlomo. UHolomisa nguye obesoloko eyimele into yokuphandwa kwemali yomhlalaphantsi kwindlu yepalamente.
Uthe akungena eholweni uNjengele Holomisa iholo yamnika imbeko ngokusukuma imqhwabele izandla ngelibonakali inkxaso nentlonipho. UGodongwana uthe imali ezazisuka kulamaphandle zaze zathunyelwa ePitoli ngo 1996 bezisoloko zigciniswe kwaSANLAM nakwaAlex Forbes zabuya. Uthe akazuthembisa nto kodwa umntu ofuna ingcaciso uzakuncedwa ngamagosa akwa-GPAA nakwaGEPF. Ngokwenene kubenjalo abantu bancedwa ngamnye- ngamnye. Bekubonakala kwa inkangeleko yolusu ukuba akukho kwanto intle kuba bebeye bajongwe impendulo ibeyethi zabatalwa zonke imali zabo.
Le nkcaza idale incinwa yokungoneliseki into yokuthi  iholo izele ime ngeembambo kungabikho namnye umntu obuya nethemba lokuqwalaselwa komcimbi wemali yakhe yomhlalaphantsi. Amalungu ekomiti ye-SATBVC abesoloko equqa ezinkundleni bephanda le mali avakalise ukungoneliseki yindlela awusingathe ngayo uGodongwana,ekhala ngelithi khange aphendule namnye umbuzo kumaxwebhu embalelwano abebesoloko bewathumela kurhulumente. UGodongwana uthe abantu abadala mabohlukane nokubhatala iimali emagqwetheni ukuze abaphandele imali zabo zomhlalaphantsi kuba zikhona iiofisi zikarhulumente ezibancedisayo abantu kulo mba. Amalungu ekomiti ekhokeleyo ithembise ngelithi asezoqhubeleka namabango kuba kukhona abantu abamane beyifumana imali yabo.
